حلقہ گریجویٹ میں مجلس کی انتخابی مہم زور و شور سے

جالنہ و اورنگ آباد میں جلسۂ عام ‘ سینکڑوں گریجویٹ شامل
ناندیڑ: ۱۳؍جون ( نامہ نگار) حلقہ اسمبلی گریجویٹ میں مجلس اتحاد المسلمین نے اپنا اُمیدوار میدان میں اُتارا ہے اور اس مہم کے لئے ریاستی صدر اپنے رُفقاء کار اور اُمیدوارایڈوکیٹ مشتاق احمد خان کے ہمراہ تمام مراہٹواڑہ کے دورے پر ہے۔ شب و روز جد و جہد جاری ہے۔ ۱۱؍جون کو جالنہ میں ایک عظیم الشان جلسہ عام منعقد کیا گیا۔ عوام کی کثیر تعداد کے علاوہ سینکڑوں گریجویٹ حضرات بھی شامل تھے۔ اس جلسہ سے سید ابراہیم علی ابو نے مجلس کے اغراض و مقاصد اور اہمیت و ضرورت کو انتہائی جذباتی انداز میں بیان کیا۔ اُمیدوارایڈوکیٹ مشتاق احمد اور سید شیر علی گروپ لیڈر نے بھی تفصیلی بیان دیا۔ ریاستی صدر سید معین کی صدارتی تقریر سے سامعین میں



خوشی کی لہر دوڑ گئی۔ اس کے بعد مجلس کا قافلہ ریاستی صدر سید معین کی قیادت میں اورنگ آباد کے لئے روانہ ہوا۔ وہاں پر رات ۹ بجے دانشورانِ ملت کی میٹنگ منعقد کی گئی۔ اس اجلاس میں سینکڑوں کی تعداد میں ڈاکٹرس ‘ وکلاء‘ ٹیچرس ‘ پروفیسرس اور گریجویٹ نوجوانوں کی کثیر تعداد موجود تھی۔ اُن حضرات نے اپنے اپنے خیالات کا اظہار کیا۔ سب کی فکر ایک ہی تھی کہ مجلس اتحاد المسلمین کو طاقتور بنانا وقت کی ضرورت ہے۔ ان میں مساجد کے امام ‘ علماء کرام کی بڑی تعداد موجود تھی۔ اس موقع پر ریاستی صدر سید معین کی تفصیلی اور مدلّل تقریر سے متاثر ہو کر وہاں موجود تمام دانشورانِ ملت نے عہد کیا کہ اس بار مجلس کے اُمیدوار کو ہی ووٹ دیا جائے گا اور آنے والے اسمبلی الیکشن میں بھی مجلس کی کامیابی کے لئے جد و جہد کی جائے گی۔